Vigo, 19 de Agosto de 2003

Excelentísimo SR. CONCELLEIRO DE CULTURA do Excelentísimo Concello de Vigo:

Por medio da presente e a través da súa Concellería, a FUNDACIÓN ENCLAVE ten a ben solicitar ao Concello de Vigo a inclusión no seu rueiro da figura de Antón Avilés de Taramancos.

Como ben sabe, este ano o Día das Letras Galegas rende homenaxe ao noiés Antón Avilés de Taramancos, un dos poetas galegos máis sobranceiros da segunda metade do século XX. Mais tamén é de lei salientar o seu labor político corolario dun compromiso co País dificilmente superábel. A súa foi, xa que logo, unha vida debuxada a dúas cores: poesía e Galiza. Cores que en ocasións eran fundidos intimamente nun só. Repárese no exemplo:

   Miña Patria:
Eu son o teu soldado mais forte.
A túa lingua é a miña espada
e cando debullo unha canción
cando florece unha palabra
canta en min o labrego cavador
o emigrante e o poeta,
o mariñeiro
o home que amasa o pan e moxe o leite,
¡Non son un home: Son un pobo
E ninguén me pode domear!

Poeta, en definitiva, de verso férreo e cristalino, épico e elexíaco. Avilés de Taramancos constrúe unha poesía poderosísima, grandiosa e coral. O amor, a ira nacionalista, a nostalxia imposíbel do noiés de dous mundos, flúen cunha forza arrebatadora nos poemas dun home rabiosamente vital que amou sen mesura a vida, a patria ea liberdade.

É, por tanto, tempo de homenaxear a figura inesquecíbel para nós de Antón Avilés de Taramancos. E é por isto que desde o Padroado da FUNDACIÓN ENCLAVE consideramos que é para a cidade de Vigo unha honra e, ao mesmo tempo, un compromiso consigo mesma, poder darlle o recoñecimento póstumo que Avilés se merece concedéndolle o seu nome a unha rúa da nosa cidade. Porque un pobo que non recoñece e ensalza a súa cultura non deixa de ser un pobo pobre.

Ao mesmo tempo, aproveitamos para solicitarlle unha entrevista formal coa finalidade de plantexármoslle as nosas propostas.

Agardando pois que sexa tomada en consideración esta demanda nosa, que é ao mesmo tempo de toda a cidadanía viguesa comprometida coa cultura, a lingua e a identidade de Galiza, porque tamén fará da nosa cidade un lugar máis querido e respeitado por todos/as.

Atentamente,

César Pazos Carreiro (667 686 570) - Alberte Vila González (625 622 206)
Padroado da Fundación Enclave