O Padroado da Fundación Enclave, co gallo de honrar como ben se merece á memoria deste noso compañeiro, acaba de apresentar oficialmente á Alcaldia de Lugo a correspondente solicitude para que un parque desta cidade recén criado e polo que el pelexou denodadamente no seu recente periodo como Concelleiro de Meio Ambiente de Lugo receba o nome de Marcos Cela.

Sexa esta unha pequena homenaxe ao noso benquerido compañeiro Marcos Cela, finado o pasado dia 10 de Marzo en Lugo, a mesma cidade amurallada que o veu nacer en 1955. Casado con Cristina Ferreiro e pai de tres rapazas, vaia desde aqui o noso máis agarimoso saúdo a elas. Empregado de banca, tiña como aficións a fotografía, a música e o deporte. Xogaba ao baloncesto e era socio do Breogán.
A sua longa traxectória política de loita incansábel polo País comeza xa na AN-PG, participando posteriormente no proceso fundacional do noso Partido. Desde 1995, desempeñaba o labor de concelleiro en Lugo polo BNG, sendo Tenente de Alcalde e Concelleiro de Medio Ambiente na pasada lexislatura. Tamén é de salientar a sua actividade sindical, pois foi Presidente do Comité de Empresa do BBV pola CIG.

SOLICITUDE DO NOME DUN PARQUE NA SUA HONRA

Padroado Fundación ENCLAVE
Apartado de Correos 1023
Santiago de Compostela.

Lugo a 12 de marzo de 2004

CONCELLO DE LUGO
Excmo. Sr. Alcalde-Presidente
Sr. D. Xosé Clemente López Orozco
Praza Maior S/N
27001 LUGO

Excmo. Sr. Alcalde

A Fundación ENCLAVE, declarada Fundación de Interese Galego por Orde da Consellería de Cultura, Comunicación Social e Turismo do 25 de xaneiro de 2001; quere solidarizarse na dor polo pasamento de Marcos Manuel Cela Fernández, membro desa Corporación Municipal e Veciño exemplar da Cidade de Lugo.
En reunión de urxencia o Padroado desta Fundación, da que El formaba parte, acordou presentar ante Vostede e ante a Corporación que preside unha petición que coidamos recolle un sentimento colectivo na cidadanía dado o seu carácter de “Bo e Xeneroso” e o traballo desenvolto durante os nove anos de Concelleiro, ben na oposición ou a fronte da Concellería de Medio Ambiente, onde a impronta da súa labor faise patente hoxendía, así como os compromisos adquiridos no eido sindical ou social polo finado Marcos Cela a prol de Lugo, os Lugueses e Galiza.

Trátase, Excmo. Sr. Alcalde de dedicarlle, na súa honra e memoria, un espacio polo que El pelexou denodadamente: “O PARQUE DA ACEA DE OLGA” que na actualidade inda non dispón de ningún nome.

Sen máis e agardando unha sensíbel resposta a esta demanda, saúdao afectuosamente en nome do Padroado da Fundación ENCLAVE.