Vén de saír do prelo o último número da revista ENCLAVE, centrado desta volta no debate estatutario que estamos a vivir na actualidade. Destaca neste número unha entrevista ao Presidente da Xunta de Galiza, Emilio P. Touriño, e as colaboracións de Iñaki Anasagasti, Josep-Lluís Carod-Rovida, Camilo Nogueira, Miguel Barros Carlos Mella, Iolanda Galanes, Álvaro López Mira, Fernando del Río, Vítor Martíns e Alberte Mahía.

O pasado 25 de novembro tivo lugar a presentación pública en Compostela do Manifesto “Estatuto de Nación para Galiza”. Manifesto que promovido desde o Padroado da Fundación Enclave pretendía acadar, desde a pluralidade, o maior eco e consenso posíbel na sociedade galega. Pretendíase co Manifesto dar apoio e cobertura a unha reclamación que desde o Padroado da Fundación Enclave consideramos básica no momento no que se está a tratar a redacción dun novo marco estatutario para o noso país. Podemos dicir agora, que o resultado foi un éxito. Acadouse o apoio dun amplo abano representativo da sociedade galega, sen sectarismos nin prexuízos, sectores todos unidos pola convición de que Galiza debe ter recoñecemento explícito como Nación no estatuto que saia dos debates parlamentares. O Consello de Redacción de ENCLAVE quere achegar desde este novo número, as reflexións que ao respecto fan, Emilio Pérez Touriño, Josep-Lluis Carod-Rovira, Iñaki Anasagasti, Carlos Mella, Miguel Barros, Iolanda Galanes, Xosé Emilio Insua, Álvaro López Mira e Camilo Nogueira. Mais sendo o cerne deste novo ENCLAVE o debate estatutario, podes atopar tamén colaboracións da importancia de Victor F.Freixanes, Alberte Mahía, Vitor M. Martins, Fernando del Río, Manuel Bragado, Santiago Jaureguizar, Francesco Traficante, Xavier Mourón e Alberte Mahía. Podes topar ENCLAVE nas principais librarías do noso país ou podes tamén facer a túa encomenda directamente no seguinte correo: info@fundacionenclave.org.