A Fundación Enclave organiza coa Área de Normalización Lingüística da Universidade de Vigo as II XORNADAS DE COORDINACIÓN DE POLÍTICAS LINGÜÍSTICAS.

Deste volta vanse desenvolver no Edificio Miralles do Campus Universitario de Vigo os días 22, 27 e 29 de novembro e o 11 de decembro en horario de tarde e validaranse con 1 crédito de libre configuración para os/as estudantes da U.Vigo.

Podes descargar directamente o dítico das Xornadas aquí.

 PRESENTACIÓN

A Fundación Enclave vén desenvolvendo actuacións de dinamización cultural que atinxen, entre outros, temas á lingua. Boa proba diso son os artigos sobre o tema nas súas publicacións periódicas, así como a organización das I Xornadas de Coordinación de Políticas Lingüísticas e a publicación das súas actas.
O cambio de goberno na Administración autonómica pode ou debe implicar un cambio na xestión lingüística, polo que a Fundación Enclave estima que este é un momento propicio para organizar as II Xornadas de Coordinación de Políticas Lingüísticas.
Nesta nova edición das xornadas a Fundación Enclave ten como obxectivo propiciar un debate sobre o cambio de orientación, asemade que divulgar e debater sobre os puntos de interese básicos sobre os que asentar unha acción política sobre a lingua. Para iso, desta volta achégase ao ámbito universitario, organizando conxuntamente estas II Xornadas coa Área de Normalización Lingüística da Universidade de Vigo.

 OBXECTIVOS

O obxectivo principal é establecer un debate no que se impliquen especialistas en lingua, mais tamén departamentos de xestión que teñen moito que achegar. Outro dos obxectivos das xornadas é favorecer o contacto entre os xestores e o colectivo profesional implicado nesta materia, así como coñecer cal é a posición e políticas da nova administración en determinados temas.

 DESTINATARIOS/AS

Estas xornadas son de interese para o colectivo de traballadores e traballadoras de normalización lingüística, industrias da lingua, investigadores/as da lingua galega e mestres e profesores de secundaria encargados dos Equipos de Normalización Lingüística.
Igualmente, tamén está especialmente dirixido ao alumnado da Universidade.

 VALIDACIÓN

Concedarase 1 crédito de libre configuración a estudantes das carreiras da Universidade de Vigo.

 PREZO DE INSCRICIÓN

- Ordinario: 10 €

- Estudantes U.Vigo: 5 €

- Bolseiros: 7,50 €

 LUGAR

Edificio Millares do Campus Universitario de Vigo (Lagoas-Marcosende).

Aula 1

 DATAS

22, 27, 29 de novembro e 11 de decembro de 2006, de 16:00 a 21:00 h.

 PROGRAMA

- Mércores 22 de novembro de 2006 ás 16.00 h.

A tradución en ámbito institucional

A cooficialidade do galego en marco institucional tivo como resultado a configuración e reinserción do galego como lingua de uso na Administración ou en parte dela. A través da publicación diaria das publicacións e boletíns oficiais, coa tradución como método, foise configurando unha lingua administrativa de seu que vén recuperar en parte a normalidade do galego administrativo medieval. Cabe preguntarse até que punto se cumpriron os obxectivos normalizadores que se marcaran nos primeiros tempos da cooficialidade, se a tradución foi a vía máis axeitada para a normalización e, mesmo, se podemos falar plenamente da (re)creación dunha variedade especializada para o galego.

- Carlos Díaz Abraira (Unidade de Tradutores do Parlamento de Galicia)
- Xermán García Cancela (Servizo de Tradución da Xunta de Galicia)
- Iolanda Galanes Santos (profesora da Universidade de Vigo)
- Xosé González Martínez (membro da Comisión Paritaria de Seguimento do Plan Xeral de Normalización do Idioma Galego e fundador da Asociación de Funcionarios pola Normalización Lingüística).

- Luns 27 de novembro de 2006 ás 16.00 h.

Desenvolvemento das novas tecnoloxías en/para a lingua galega

A investigación e o desenvolvemento de aplicacións e ferramentas informáticas é unha das tarefas urxentes para a execución dunha exitosa planificación do idioma. Ademais, tamén convén avaliar a presenza da lingua na rede, coñecer o apoio institucional á promoción da lingua nas novas tecnoloxías e o seu impacto na normalización do idioma. Por todo iso, o obxectivo desta mesa é reunir especialistas e profesionais en desenvolvemento de aplicacións para o traballo lingüístico con responsables da xestión na Consellaría de Innovación e Industria para debater sobre estes temas.

- José Ramom Pichel Campos (Imaxin Software)
- María Yáñez Anllo (exdirectora de Vieiros)
- Xavier Gómez Guinovart (profesor na Universidade de Vigo)
- Representante da Dirección Xeral de Promoción Industrial e da Sociedade da Información/ representante da Dirección Xeral de I+D

- Mércores 29 de novembro de 2006 ás 16.00 h.

Iniciativas parlamentarias en prol da lingua

O traballo parlamentario neste eido é absolutamente descoñecido para a sociedade en xeral e tamén para moitos dos normalizadores/as do país. Convocamos nesta mesa os deputados/as dos tres partidos que se encargan dos temas de lingua para dar a coñecer as súas propostas. Serán temas de especial interese a reforma do marco normativo da lingua a partir da reforma estatutaria ou a necesidade dunha nova Lei de normalización lingüística. O obxectivo é dar a coñecer a posición de cada organización política con respecto á lingua galega.

- Deputado/a do Grupo Parlamentario do Bloque Nacionalista Galego
- Deputado/a do Grupo Parlamentario do Partido Popular de Galicia
- Deputado/a do Grupo Parlamentario do PSdeG-PSOE

- Luns 11 de decembro de 2006 ás 16.00 h.

Marco normativo da lingua

Nesta mesa redonda participan especialistas en lexislación lingüística galegos e do País Vasco que analizarán a consideración das linguas propias no Estado, as novas posibilidades dos novos estatutos, a necesidade de modificar, anovar ou consensuar unha novas leis de normalización lingüística de acordo co marco estatutario vixente no futuro. Analizaranse tamén os desenvolvementos normativos fundamentais para unha política lingüística eficaz.

- Alba Nogueira López (profesora de Dereito Administrativo da Universidade de Santiago de Compostela)
- Iñaki Agirreazkuénaga (catedrático de Dereito Administrativo da Universidade de País Vasco)
- Xesús Costas Abreu (técnico de Administración Xeral)
Modera: Henrique Costas González (responsábel da Área de Normalización Lingüística da Universidade de Vigo)

 INSCRICIÓN

Para formalizar a inscrición nestas Xornadas deberá:
1. Ingresar na conta bancaria 2091 0719 71 3040000397 (Caixa Galicia) a cantidade que lle corresponda (estudantes U.Vigo, 5 €; bolseiros/as, 7,50 €; outros, 10 €), indicando no momento do ingreso o seu nome completo como ordenante e como concepto “Inscripción xornadas lingua”. Data límite: 21/11/06 ás 14:00 h.
2. Entregar o día 22 de novembro ás 16:00 horas no intre de acreditarse a ficha de inscrición que pode descargar aquí, xuntamente cunha fotocopia do seu Documento de Identidade, do xustificante bancario de pagaento da súa inscrición nas xornadas e do impreso A-0 (só estudantes).

 MÁIS INFORMACIÓN

Pode clarificar as súas dúbidas contactando directamente en info@fundacionenclave.org ou ben no tlf. 605792322 (Manoel Bello, organización)