Dentro do proceso de remodelación do Padroado desta Fundación, destacar as incorporacións a este organismo de dirección da actividade da Fundación de Manuel M. Bragado, Iolanda Galanes e Fernando del Río, ratificadas na xunta do 14 de Outubro.

Manuel Bragado: é director de Edicións Xerais de Galicia desde xaneiro de 1994. Licenciado en Ciencias da Educación pola USC e mestre de educación infantil e primaria, ten publicado varios libros de carácter pedagóxico e elaborado numerosos proxectos didácticos de libros de texto. É director da Revista Galega de Educación, foi membro das ponencias de 'Lingua' e 'Literaturas e industrias da edición' do Consello da Cultura, e redactor do documento 'Lingua e edición' da ponencia de Cultura do proxecto Galicia 2010, publica regularmente artigos na prensa galega. Foi tamén coordinados da ponencia de Política Lingüística do Foro polo Novo Estatuto.

Iolanda Galanes: é técnica documentalista da Sección de Lingua do Consello da Cultura Galega e profesora asociada do Departamento de Tradución e Lingüística da Universidade de Vigo. É socia fundadora da Coordinadora de Traballadores/as para a Normalización Lingüística e presidenta da Sociedade Galega de Terminoloxía. Doutorouse en Filoloxía Galega pola USC cunha tese sobre linguaxe administrativa.

Fernando del Río: Doutor en Economía pola Universidade Carlos III. Profesor no Departamento de Fundamentos da Análise Económica da USC. Coordinará a Comisión de Política Económica do Padroado da Fundación Enclave.